Oktyabr 4, 2022

Azərbaycanda beynəlxalq təhsil forumu keçiriləcək

Azərbaycanda beynəlxalq təhsil forumu keçiriləcək

Azərbaycanda “Təhsildə yeni çağırışlar” Beynəlxalq Forumunun keçirilməsinə hazırlıq prosesi gedir. Forumun Təşkilat komitəsinin sədri, TAM Teaching Advancement Matrix-in (Tədrisdə Ali Matriks) baş direktoru Cəfər Mənsimidən aldığımız məlumata görə, Forum bu il sentyabrın 1-də internet platformaları üzərindən online formada keçiriləcək.

TAM-ın təşkilatçılığı və Təhsil Nazirliyi yanında İctimai Şuranın dəstəyi ilə təcrübə, aktuallıq və mübadilə başlıqları altında reallaşdırılacaq forumun əsas hədəfi yeni dövrün təhsil tələbləri və təhsildə keyfiyyətin yüksəldilməsi ehtiyaclarının müzakirəsidir.

Başqa sözlə, “Özünü TAM-amla” şüarı ilə yola çıxan TAM-ın başlıca məqsədi müəllim peşəkarlığını yüksəltmək, müəllimlərin şəxsi və pedaqoji inkişafını dəstəkləmək, yerli və beynəlxalq təhsil işçilərinin əməkdaşlıq və təcrübə mübadiləsini təşkil etmək, müəllimlərin özlərini inkişaf etdirməsinə şərait yaratmaq, təhsildə kreativ yanaşmaları artırmaqdır.

Məlumdur ki, COVID-19 pandemiyası nəticəsində 193 ölkədə təhsil müəssisələrinin fəaliyyəti dayanıb. Bir çox ölkələr kimi, Azərbaycan da məsafədən təhsilə keçməyə məcbur olub. Odur ki, mövcud vəziyyəti təhlil etməyə, təhsildəki yeni çağırışları müzakirə etməyə ehtiyac yaranıb.

Postpandemiya dövründə təhsildə keyfiyyəti artırmaq üçün nələr etməliyik? Təhsilin keyfiyyətli olması üçün hansı imkanlar var? Təhsilin məzmununda, təhsilverənlərin rolunda hansı dəyişikliklər yaranacaq? Təhsilverənlər hansı bacarıqlarını inkişaf etdirməlidir?

Forum zamanı çıxışlar və müzakirələr vasitəsilə bu kimi sualların cavablandırılması nəzərdə tutulur. Forumun əsas məruzəçisi (keynote speaker) PİSA-nın (Program for International Student Assessment – Şagird nailiyyətlərinin beynəlxalq qiy­mətləndirilməsi proqramı) direktoru Andreas Şlyaxer olacaq.

Qeyd edək ki, Azərbaycan 2006-cı ildən həmin proqramın iştirakçısıdır.

Bundan başqa, Forumda Təhsil Nazirliyi yanında İctimai Şuranın sədri, prof essor Şahlar Əsgərov, “The Global Prize 2018” müsabiqəsinin qalibi Andria Zafirakou, Britaniya Təhsildə Liderlik, İdarəetmə və İnzibatçılıq Cəmiyyətinin (BELMAS – The British Educational Leadership, Management and Administration Society) rəhbəri, Honkonqdakı ESF Sha Tin Junior məktəbinin direktoru Rehana Shanks, UNICEF-n Azərbaycan nümayəndəliyinin Təhsil proqramlarının rəhbəri Leyla Həsənova, Milli Məclisin Elm və təhsil komitəsinin üzvü, millət vəkili Ceyhun Məmmədov, Şimali Kipr Türk Cümhuriyyətinin ikinci prezidenti və sabiq təhsil naziri Mehmet Ali Talat, Xalq yazıçısı Çingiz Abdullayev, Doğu Akdeniz Universitetinin doktorantı, beynəlxalq təlimçi Arzu Soltan, Türkiyənin Yenilikçi Öğrenme Məktəblər Şəbəkəsinin yaradıcısı Kayhan Karlı, Forumun Təşkilat Komitəsinin sədri, TAM-ın baş direktoru Cəfər Mənsimi çıxış edəcəklər.

Forumun moderatorları Azərbaycan Dövlət Pedaqoji Universitetinin tədris işləri üzrə prorektoru, dosent Eldar Aslanov və təhsilin idarə olunması üzrə mütəxəssis Salih Sarpten olacaq.

Forum günü TAM-ın təsis etdiyi yeni eyniadlı təhsil jurnalı da təqdim ediləcək. Əsas məqsəd bütün öyrənmə proseslərinin maraqlı, yaradıcı, yeni tərəflərindən söz açıb onları təbliğ etmək, təhsil sahəsində hiss olunan boşluqları tamamlamaqdır.

Forumun informasiya dəstəkçisi Təhsil İdarəçiləri Assosiasiyası, Təhsil Forumu-2020 Facebok qrupudur. TAM komandası pandemiya şəraitini nəzərə alaraq Beynəlxalq Forumda iştirakın ödənişsiz olmasına qərar verib.
Yalnız TAM-ın facebook https://www.facebook.com/tammatrix) və ya instagram (https://www.instagram.com/tammatrix/) səhifəsini bəyənən və özü ilə foruma bir nəfər dəvət edən iştirakçıların müraciəti təsdiqlənəcək və onlara iştirak linki göndəriləcək. Arzu edən iştirakçılara beynəlxalq sertifikat veriləcək.
Qeydiyyat üçün: https://forms.gle/DnFz2e8mVxNzSPJZ8 (Azərbaycan müəllimi)

Mənbə: AzEdu.az
Müxbir: Zahidə Nəbizadə

Həmcinin bax https://kafkazh.com/serq-qaranqusu/https://kafkazh.com/azerbaycan-texniki-universitetinde-tehsil-alan-617-telebe-yay-mektebine-muraciet-edib/

Translate »