Oktyabr 5, 2022

Gömrük-sərhəd buraxılış məntəqələrində kompleks tədbirlər həyata keçirilir

Gömrük-sərhəd buraxılış məntəqələrində kompleks tədbirlər həyata keçirilir

Koronavirus pandemiyasının yayıldığı ilk günlərdən etibarən Dövlət Gömrük Komitəsi yoluxmanın əhatə dairəsinin genişlənməsinin qarşısının alınması məqsədilə gömrük-sərhəd buraxılış məntəqələrində kompleks tədbirlər həyata keçirir.
AZƏRTAC xəbər verir ki, pandemiyaya qarşı mübarizə istiqamətində həyata keçirilən tədbirlərlə bağlı məlumat verən DGK Gömrük Sərhəd Buraxılış Məntəqələrinin İşinin Təşkili Baş İdarəsinin rəisi Şahin Ələsgərovun sözlərinə görə, ölkə ərazisinə daxil olan bütün nəqliyyat vasitələri 3 mərhələdə dezinfeksiya olunur. Bunun üçün bütün gömrük-keçid məntəqələrində xüsusi stasionar dezinfeksiya avadanlıqları quraşdırılıb. Eyni zamanda, xüsusi təlimatlandırılmış əməkdaşlar daşınan avadanlıqlar vasitəsilə nəqliyyat vasitələrinin kabinlərini də dezinfeksiya edirlər.
Gömrük-keçid məntəqələrində fəaliyyət göstərən bütün gömrükçülər xüsusi geyim vasitələri ilə təmin olunub və həmin geyim vasitələrindən təhlükəsiz qaydada istifadəyə dair təlimatlandırılıb.
Yük daşımalarını həyata keçirən nəqliyyat vasitələrinin sürücüləri sərhəd buraxılış məntəqələrindən Azərbaycan Respublikasının ərazisinə daxil olduqları vaxt laboratoriya müayinəsindən keçirilir və nəticələr əldə olunanadək yaşadıqları və ya olduqları yerdə sanitariya qaydalarına riayət etməklə karantin nəzarətinə götürülürlər.
Eyni zamanda, Azərbaycan ərazisində tranzitlə hərəkət edən nəqliyyat vasitələrinin sürücüləri sərhəd buraxılış məntəqəsinə daxil olduqları vaxt həmin şəxslərin sağlamlıq vəziyyəti qiymətləndirilir və onların təyinat məntəqəsi istiqamətində nəqliyyat vasitəsini tərk etməmək şərti və Daxili İşlər Nazirliyinin əməkdaşlarının müşayiəti ilə maneəsiz hərəkəti təmin edilir. Nəqliyyat vasitələri təyinat məntəqəsinə qədər yanacaqla təmin olunur. Sürücülər marşrut boyunca zəruri ehtiyacların təmin edilməsi məqsədilə dayanma, durma hallarına yol verdikləri zaman fərdi vasitələrdən mütləq istifadə, sosial məsafənin qorunması barədə ciddi təlimatlandırılır.
Azərbaycan ərazisində tranzitlə hərəkət edən nəqliyyat vasitələrinin sürücülərinin sərhəd buraxılış məntəqəsində sağlamlıq vəziyyətinin qiymətləndirilməsi zamanı onların virusa yoluxma şübhəsi yarandıqda gəldikləri ölkənin səlahiyyətli orqanlarına məlumat verməklə geri qaytarılırlar. Virusa yoluxma şübhəsi Azərbaycan ərazisinə daxil olduqdan sonra və ya təyinat ölkəsinə hərəkət zamanı yarandıqda, həmin şəxslər laboratoriya müayinəsindən keçirilməklə tibbi çeşidləmə müəssisəsinə göndərilirlər.

Mənbə: azertag.az
Xebeci Jalə Hüseynova

Hemcinin bax https://turaz.org/turkiyede-ve-iraqin-simalinda-doqquz-terrorcu-zerersizlesdirilib/

https://turaz.org/turkiyede-1800-mese-yangini-bas-verib/

Translate »